ငယ်ဘဝများ (၁၉) နဲ့ ရာသီပျက်

စာရေးသူ-ရွှေစင်ဦး

မိုးတွင်းတဲ့ဗျာ .. ပူလိုက်တာ.. ပူစပ်ပူလောင် နဲ့ အနေရခက်လိုက်တာ.. ချွေးတွေထွက်ပြီး လှောင်အိုက်နေတဲ့ ပူပုံ ပူနည်းကြီး က ဆိုးလိုက်တာ... အဲဒီလောက် ပူလွန်းအားကြီးတော့လည်း ရွှေစင်ဦး တို့ ငယ်ငယ်က မန္တလေး မိုးတွင်း ကို သတိရမိတယ်.. မန္တလေး မှာ ပူတယ်.. မိုးတွင်း ဆို မိုးသိပ်မရွာဘူး ဆိုတာ မှန်ပါတယ်... ဒါပေမဲ့  မိုးတွင်း မှာ ဒီလောက် မပူသလို မိုးလည်း ရွာသင့် သလောက် (မိုးတွင်း နဲ့ တူအောင်တော့) ရွာပါသေး တယ်ဗျာ...။

အခုလို မိုးတွင်း လို့ ပြောလို့ မရအောင် ကို မိုးလည်း မရွာ ပူလည်း ပူလွန်းတော့ ကျနော် တို့ ငယ်ငယ်က မန္တလေး မိုးတွင်းလေး ကို ပြန်လွမ်းမိတယ်....။

ကျနော် တို့ ငယ်ငယ်က မိုးတွင်း ဆိုရင် ဈေးကပြန်လာ တဲ့ မေမေ့ ဈေးခြင်းထဲက မိုးစာလေး တွေ ကို အရင်ဆုံး တွေ့ရတော့ တာပါဘဲ .. လယ်ပုဇွန်လုံး ခပ်သေးသေး လေးတွေ ဖားလေး တွေ ဇရစ် စီး နုနု လေး လယ်ကန်စွန်း လတ်လတ် လေး မျှစ်စိမ်း လေး တွေပါ .. ဒါလေး တွေပါလာရင် .. မန္တလေး မြို့ပေါ်မှာ မိုးမရွာတောင် အနီး တဝိုက် မှာ မိုးရွာ နေတယ်ပေါ့...။

နောက်တခါ မန္တလေး မြို့ပေါ်မှာ မိုးရွာတယ်... စွေပြီး ရွာတာများပါတယ်... တခါရွာလိုက်ရင် ဆက်တိုက် ၃-၄-၅ ရက် မငြီးငွေ့တမ်း ရွာတော့တာပါဘဲ... အဲလို နှစ်ရက်လောက်များ ဆက်ရွာလိုက်ပြီ ဆိုရင် မန္တလေး သူ မန္တလေးသား တွေ ပါးစပ်က ထွက်လာပါပြီ ... မိုး စရွာတာ စနေ နေ့ ညနေကြီး က မဟုတ်လား ဟဲ့ .. ဒါကြောင့် စွေတော့ တာပေါ့.. ရွာအုန်း မှာ နောက်တပတ် စနေထိ ဆိုပြီး ပြောကြတော့တာ ပါဘဲ... တကယ် လည်း များသော အားဖြင့် စနေ ရွာတဲ့ မိုးနဲ့ စွေတဲ့ မိုးဟာ တိုက်ဆိုင် တတ်ပါပေတယ်...။

မိုးတွေစွေ ပြီး များ ရွာရင် အခုခေတ် ရွာတဲ့ မိုး လို မိုးကရွာ ချွေးကထွက် ဆိုတဲ့ မိုးမျိုးမဟုတ်ပါဘူး.... တရက် ထက် တရက် စိမ့် နေအောင် အေးလာတဲ့ မိုးပါ...။

ငယ်ငယ် က များ မိုးရွာရင် သိပ်ကို ပျော်တာဘဲ... အရင်ဆုံး ကျောင်းမတက်ရတော့ဘူး.. ရွှေမန္တလေး အကျင့် က မိုးရွာရင် ကျောင်းမသွားဘူး အလုပ်မသွားဘူး.. အများစုနော် အခုခေတ်ထိဘဲ... ရန်ကုန် က အလုပ်ကိစ္စ နဲ့ လာတဲ့ အမျိုးတွေ များဆို သိပ်ပြော ကြတာဘဲ .. မိုးရွာလို့ အလုပ်မသွား ကျောင်း မသွားရင် ဘယ်လို ပိုက်ဆံရ မလည်း ဘယ်လို စာတတ် မလည်း ပေါ့.. ကျနော် လည်း ပြန်ဖြေလိုက်တာဘဲ... ဒီလိုဘဲ ရ ဒီလိုဘဲ တတ်သွားတာဘဲ လို့ မန္တလေး မှာ မိုးရွာ လို့ အလုပ်မလုပ် တဲ့ လူ ကို စိတ်ဆိုး နေလို့ ကတော့ စိတ်ဆိုး တဲ့ လူ သာ ဒုက္ခရောက်မှာဘဲ... မန္တလေး သားတွေ ကတော့ အခုထိ နေမြဲ ဘဲလို့...။

ဟုတ်တယ်လေ ဗျာ... မိုးတွင်း တတွင်း လုံး မှ ၄-၅ ကြိမ် အလွန်ဆုံး ၁ဝ ကြိမ် လောက် ဘဲ သွားမဖြစ် လာမဖြစ် အောင် ရွာတာကိုးဗျ.. အခုဆို ပိုဆိုးပါတယ်... မရွာသလောက် ပါဘဲ..။

အင်း ငယ်ငယ် က မိုးတွင်း အကြောင်းရေး မလို့ ဟိုရောက်ဒီရောက် ဖြစ်သွားပြန်ပြီ... အဲလို မိုးတွေ ဆက်ရွာပြီ ဆိုရင် ကျနော်တို့ ကလေး တွေ က အရမ်းပျော်တယ်... ကျနော် ဆိုရင် ကျောင်းမသွားဘဲနဲ့ စောင်ပုံ ထဲမှာ စာအုပ် တအုပ်နဲ့ မိုးသံ လေး နားထောင်လို့ အကျအန ကွေးတော့ တာဘဲ .. မျက်စေ့ ညောင်း ရင် အိပ်ပျော်သွားလိုက် ... နိုးလို့ ဗိုက်ဆာ ရင် ထ စားလိုက်ပေါ့...။

အဲလို မိုးတွေ စွေ တဲ့ အခါ ဗိုက်ကလည်း ဆာတယ်ဗျ... မိုးနဲ့ အပြိုင်စားကောင်းသလား  လည်း မမေးနဲ့ ဘာလေး ဘဲ ချက်ချက် ပါ .... ဟင်းကောင်း ချက်ရအောင် အဲလို မိုးရွာ ကြီး ထဲ မှာ ဘယ်သူ မှလည်း အရေး လုပ်ပြီး ဈေးမသွားကြ ပါဘူးဗျာ... အိမ်မှာ ရှိတာ.. ရပ်ကွက်ထဲ ရှိတဲ့ အိမ်ဆိုင် က ဟာလေးနဲ့ ဖြစ်သလိုလေး ချက်လိုက် စားလိုက်ကြတာ ပါဘဲ.. ဖြစ်သလိုလေး ပေမဲ့ မိုးအေးတော့ ဆာဆာ နဲ့ အခါတိုင်းထက်တော့ စားကောင်းတာ အမှန်ပါဘဲ...။

ကျနော့် မေမေ ဆိုရင် မိုးတွေ များ ရွာရင် အိမ်မှာ ရှိ တဲ့ ဟင်းသီး ဟင်းရွက် အကြွင်း အကြံ တွေ ကို ငါးခြောက်ရိုးလေး.....အာလူး လေး နဲ့ ပဲကုလားဟင်း မချိုမချဉ် လေး ကို မဆလာ မွှေးမွှေး လေး နဲ့ ချက်တယ် .. ဘဲဥကို ကြက်သွန် ခရမ်းချဉ်သီး တွေနဲ့ကြော်တယ်... ဘာလချောင်ကြော် ချိုချဉ်စပ် လေး လည်း ပါလိုက် သေးတယ်... ဗိုက်ဆာဆာ နဲ့ စားကောင်းသလား မမေးပါနဲ့ .. ပဲဟင်း ပူပူလေး မှုတ်သောက်... ဘာလချောင် ကြော် လေး မြုတ်မြုတ်စား ကောင်းလိုက်တာ......။

စားသောက်ပြီး... ဗိုက်လေး လေး နဲ့ စောင်ခြုံ ထဲ တခါ ပြန်ကွေး စာအုပ်လေး ၂မျက် နှာ လောက်ဖတ် ပြီး ဘုတ်ခနဲ့ ပြုတ်ကြ လို့ တရေးရသွားပြန်ရော... အင်း .. ငယ်ငယ်တုန်း က မန္တလေး သား (အညာသား) တွေ ရဲ့ စည်းစိမ်တွေ ပေါ့ ..... အခုတော့ အညာ မှာ မိုးတွင်း စည်းစိမ် ဆိုတာ ဂျိုနဲ့လား လို့ မေးရမတော့ လောက်အောင် ကို ပူလိုက် တာ ဗျာ.... ။

အင်း....  ရာသီပျက် လူပျက် တွေ နဲ့ ဘယ်တော့လောက် ထိ ဘယ်လိုများ နေရပါ့ မလည်း လို့ တွေးမိ လို့ ရေးမိ တာ ပါ....။

လေးစားစွာဖြင့်

ရွှေစင်ဦး 

(Google မှ ပုံယူပါ၏)