ရွှေစင်ဦး ကြိုက်တဲ့ အညာဟင်းလေးများ (၁၂)

စာရေးသူ-ရွှေစင်ဦး

ရွှေစင်ဦး တယောက် စာမရေးနိုင်ဘဲ ပျောက်နေတဲ့ အတွက် ဘာတွေများလုပ်နေလည်း ဆိုတာ သိချင်တဲ့ သူများ အတွက် ရောက်တတ်ရာရာလေးတွေ ရေးပေးပါမယ်…။

အခု ရွှေစင်ဦး ခွဲရေး (ဝေခြမ်းရေး) တွေ လုပ်နေရပါတယ်… မင်းက တိုက်နှစ်လုံး ကား၅စီး ယူ ပြီးတော့ တရားဝင် သိန်းတရာ ယူ တရားမဝင် သိန်းတထောင် ယူ.. မင်းကတော့ အငယ်ဖြစ် နေတဲ့ အတွက် သိန်းငါးဆယ် ယူ ကားကတော့ ၄စီး ဆို တော်ပြီ လို့များ ပြောတာ ကို ကြားလိုက်ရရင်.. ရွှေစင်ဦးတော့ ဘိုးဘွားပိုင် မိထွေးပိုင် ပထွေးပိုင် အမွေပစ္စည်း တွေ ကို ဝေခြမ်းရေးလုပ်နေတာထင်တယ်. အမွေ ရတော့မယ် ဆိုပြီး အထင်ကြီး မသွားကြပါနဲ့… ရွှေစင်ဦး မှာ အမွေပေး မဲ့ ဘယ်ပထွေး ဘယ်မိထွေး မှ မရှိသလို ဘယ်အမွေမှ ရစရာ မရှိပါဘူး.. ဒါပေမဲ့ အဲလို ရချင်မိလို့ စိတ်ကူးယဉ်မိတာပါ.... ။

တကယ်တန်း... ရွှေစင်ဦးလုပ်နေတဲ့ အလုပ်က ဆိုင်က ကလေးများကို ဟင်းချက်ကျွေးနေရတဲ့ အတွက် ဟင်းများ ဝေစု ခွဲနေရခြင်း ဖြစ်ပါတယ်…။

ဆိုင်မှာ စားတဲ့ ကလေး ၁၁ယောက် အိမ်သားသုံးယောက်နဲ့ ဆိုရင် ၁၄ယောက်စာ ညမနက် ချက်ရပါတယ်…၊ အရင်ကတော့ အချက်အပြုတ် ဝါသနာ ပါတဲ့ ကလေးတယောက်ရှိတဲ့ အတွက် အဆင်ပြေ ပေမဲ့ အခု နယ်ပြန်သွားတဲ့ အတွက်… ဆိုင်မှာ ရှိတဲ့ သမီးတွေက အလှည့်ကျ ချက်ကြ ပါတယ်.. ကလေးတွေက သူတို့ ချက်ကျွေးရင် သိပ်မစားကြပါဘူး.. နောက်ပြီး အခုတလော အလုပ်များနေ တဲ့ အတွက် သူတို့လည်း မအားတော့ ချက်ပြုတ်ရေး တာဝန်က ရွှေစင်ဦး ခေါင်းပေါ် ရောက်လာပါတယ်… အားလုံး ကလည်း ကျနော် ချက်ရင် စားကောင်းတယ် လို့ထင်တဲ့ အတွက် ဟင်းများ မလောက်မငှ  ဖြစ်လာ ပါတယ်.. ။

ဒါကြောင့် ချစ်ညီမ ကို ပုဂံ အသေးလေးတွေ ဝယ်ခိုင်းပြီး ဝေစုခွဲပေးနေရခြင်းဖြစ်ပါတယ်… တနေ့ တနေ့ ချစ်ညီမ ဝယ်လာတဲ့ ဟင်းတွေ တမျိုးပြီးတမျိုးချက် ရပါတယ်.. မမောပါဘူး ကလေးတွေ ကလည်း ဝိုင်းကူကြပါတယ်.. အင်း အားလုံးချက်ပြီးမှ ဟင်းခွက်လေး တွေထဲ ခွဲထဲ့ ရတာ ကျနော့် အတွက်တော့ အမောဆုံးပါဘဲ.. ဟင်းခွက်လေးတွေ အားလုံးညီအောင် အဆီအသားမျှအောင် အတုံးရေ ကိုက်အောင် လုပ်ရတာ ဦးနှောက်ခြောက်လွန်းလို့ ထွက်တောင်ပြေးချင်ပါတယ်….။

အဲဒါနဲ့ ကျနော်လည်း စဉ်းစားမိတယ်… သြ လူတွေ အမွေ များ ခွဲရင် ဘယ်နဲ့လုပ်ပါ့မလည်း လို့ … အမွေ လို့ ပြောတဲ့အခါမှာ မိမွေဘမွေ (ခံစားသင့်တဲ့ အမွေ) မျိုးကို ခွဲရတဲ့ အခါမှာ ပြသာနာမရှိပါဘူး.. မိဘတိုင်း ဟာ သားသမီး တိုင်းကို ပေးချင်တယ် ရစေချင်တဲ့ အတွက် မေတ္တာနဲ့ ပေးတာဖြစ်တဲ့ အတွက် သာသည်နာသည် မတွက်ဘဲ အားလုံးရသွားရင် ကျေနပ်ကြမှာပါ…။

အဲဒီလို မဟုတ်ဘဲ.. ပထွေးအမွေတို့ မိထွေးအမွေ တို့များ ခွဲရရင် ဒုက္ခလို့ ဘယ်ပထွေး ဘယ်မိထွေး မှ သူတို့ ရှာဖွေ ထားတာတွေ ကို မဆီမဆိုင် သူတို့ နဲ့ ဘာမှ မတော်စပ်…  သူတို့ကို လည်း ဘာမှ အကျိုး မပြုတဲ့ မယားပါသားသမီး..  လင်ပါသားသမီး တွေကို ခွဲပေးရရင် အင်း တော်တော် နှမြောမှာပါ..နောက်ပြီး မသဒ္ဒါ ဘဲ ပေးရတာဖြစ်တဲ့ အတွက်အဆိပ်အပင်းဖြစ်မှာတောင် ကြောက်ရပါတယ်…ရွှေစင်ဦး တို့တော့  လိုချင်ပေမဲ့  ယူရဲပါဘူး ဗျာ… သံသရာ အဆက်ဆက် ကြောက်လွန်းလို့… ။

ကဲ… ဒါနဲ့ ရွှေစင်ဦး ရဲ့ တောရောက် တောင်ရောက် အရေမရ အဖတ်မရ တဲ့ စိတ်ကူးယဉ် ခွဲခြမ်းရေး သဒ္ဒါရေစာ… မသဒ္ဒါရေစာ ခွဲခြမ်းရေး တွေ ခဏထားပြီး ဒီနေ့ ချက်ထားတဲ့ ဟင်းလေးတွေကို ပြောပါမယ်.. မန္တလေး မှာ ဝက်တွေ ကလည်း ရောဂါရနေတဲ့ အတွက် အိမ်မှာ ဝက်မချက်တာ ကြာပါပြီ… ကြက်...ငါး....  ဥ တလှည့် စီ .. တခါတလေ လည်း ဥ နဲ့ ငါး  တွဲရက် ... ငါးမကြိုက်တဲ့ ကလေးတွေ အတွက် ဥ ပေါ့… ။

ဒီနေ့တော့ ချစ်ညီမ က ဆိတ်သားဝယ်လာပါတယ်… ဆိတ်သားနှပ်ချက်ပါတယ်… ဆိတ်သား အနေတော် အတုံးလေး တွေ ကို ဂျင်းကြက်သွန်ဖြူထောင်း အရောင်တင် ဆနွင်း ဆား နဲ့ သံပရာသီး တလုံး ညှစ်ပြီး အားရပါးရ နယ်ပြီး နှပ်ထားပါတယ်… ကြက်သွန်ဖြူနီ ဂျင်း ဆီသပ်ပြီးမှ ဆိတ်သားပေါ်လောင်းချပြီး ဆိတ်သား ရေခမ်းသွားအောင် မွှေနေရပါတယ်.. ရေခမ်းတဲ့ အချိန်ကြမှ ရေ ဖြေးဖြေးချင်း ထဲ့ပြီး နူးအောင် တည် ရပါတယ် .. မဆလာ ခတ်ဖို့ လည်း မမေ့နဲ့နော် … ကဲ ဆိတ်သားဟင်း တခွက်တော့ ကျက်ပါပြီ…။

သရက်သီး မကြီးမငယ်လေးတွေ ဝယ်လာ ပါတယ်… ပဲသီးဝယ်လာပါတယ်… သရက်သီး လေးတွေ အခွံခွာပြီး ခပ်သေးသေး လေးတွေ လှီးပြီး ထောင်းပါတယ် ငါးပိ ပုဇွန်ခြောက် ငရုပ်သီး နဲ့ပါ…  ထောင်းပြီးရင် ကြက်သွန်နီ ပါးပါးလှီးထဲ့ပြီး ဆီဆမ်း ပါတယ်.. မရမ်းသီးထောင်း လိုပါဘဲ.. မရမ်းသီးလောက် မချဉ်တဲ့ အတွက် ထမင်းမြိန်မှာတော့ သေချာပေါက်ပါဘဲ…။

ပဲသီးကြော်ပါတယ်.. မနေ့က အညာ ငရုပ်သီးထောင်းလည်း ကျန်ပါတယ်.. ဆိတ်သား မစားတဲ့ ကလေး တွေ အတွက်တော့ ဥကြော်ပါတယ်… အသားမစားတဲ့ ချစ်ချစ်ကြီး အတွက်တော့ squid ပါ.. ဓါတ်ပုံ ရိုက်တာ နောက်ကျလို့ ဟင်းကုန်ခါနီး ဖြစ်သွားတဲ့ အတွက် ဦးရာလူပေါ့ဗျာ... ကဲ... အားလုံး စားကောင်းကြ ပါစေ...။

လေးစားစွာဖြင့်
ရွှေစင်ဦး

.